വിജയരാജമല്ലിക എഴുതുന്ന സ്ഥിരം പംക്തി 'മറുകളം' ആരംഭിക്കുന്നു.

കവിത

ചാരം

വിജയരാജമല്ലിക

കവിതാ ആസ്വാദനം,വര

അനാമിക പ്രകാശ്

വിജയരാജമല്ലികയുടെ 'ചാരം' എന്ന കവിതയാണ് മറുകളത്തിൽ ഈ ലക്കം ഹൃദയപൂർവ്വം വായനയ്ക്കു സമർപ്പിക്കുന്നത്.

ചാരം

വിജയരാജമല്ലിക

ആണായി ചമഞ്ഞ് നടന്നോരെയും

പെണ്ണായി കുറുകിയോരെയും

കണ്ടിരിക്കുന്നു

അടുത്തറിഞ്ഞിരിക്കുന്നു

ഞാൻ രണ്ടിലും

പെടാത്തൊരാൾ

രണ്ടും തികഞ്ഞൊരാൾ

ജോലിയോ ചുടലക്കാട്ടിലും

എന്ത് ആണ്?

എന്ത് പെണ്ണ്?

എല്ലാം ഇന്നെന്റെ മുഷ്ടിക്കുള്ളിലെ

ഒരുപിടി ചാരം മാത്രം!

കവിയെ കുറിച്ച്

വിജയരാജമല്ലിക (ദൈവത്തിന്റെ മകൾ)

മലയാള ഭാഷയിൽ ആദ്യമായി അടയാളപ്പെടുത്തിയ ട്രാൻസ്ജെൻഡർ കവി. എഴുത്തുകാരി, സാമൂഹ്യ പ്രവർത്തക, പ്രഭാഷക. ആദ്യ കവിതാ സമാഹാരം ദൈവത്തിന്റെ മകൾ (2018)പുറത്തുവന്നു. ഇത് മലയാളത്തിലെ ആദ്യ ട്രാൻസ്ജെൻഡർ കവിതാ സമാഹരമായി അറിയപ്പെടുന്നു.2019ലെ യുവ കലാസാഹിതിയുടെ വയലാർ രാമവർമ്മ കവിത പുരസ്‌കാരം ലഭിച്ച ഈ പുസ്തകം മദ്രാസ് സർവ്വകലാശാലയിൽ പിജി മലയാളം സിലബസിൽ ഉൾപ്പെടുത്തിയിട്ടുണ്ട്. ദൈവത്തിന്റെ മകൾ ലെ രണ്ട് കവിതകൾ കേരളത്തിലെ എം ജി, കാലടി ശ്രീ ശങ്കരാച്ചാര്യ സർവ്വകലാശാലകളിലും പിജി പാഠ്യവിഷയമാണ്.2019ൽ പുറത്തിറങ്ങിയ ആൺ നദി , മേഘ മാംസം, ജലക്കുടിരം, കാളച്ചുവപ്പുകൾ തുടങ്ങി മലയാള ഭാഷയിലേക്ക് 10പുതിയ പദങ്ങൾ സംഭാവന ചെയ്തു. "മല്ലികാവസന്തം" (ആത്മകഥ)കേരള സംസ്ഥാന സർക്കാറിന്റെ സാഹിത്യ വിഭാഗത്തിലെ യുവപ്രതിഭ സ്വാമി വിവേകാനന്ദൻ പുരസ്‌കാരത്തിനർഹ (2019)മായി.ഇതേ പുസ്തകം പ്രഥമ ലീല മേനോൻ പുരസ്‌കാരം(ആത്മകഥാ വിഭാഗം)ത്തിനും അർഹമായി."ആണല്ല പെണ്ണല്ല കണ്മണി "എന്നു തുടങ്ങുന്ന ഇന്റർസെക്സ് വിഭാഗത്തിലെ മിശ്രലിംഗരായ കുഞ്ഞുങ്ങൾക്കുള്ള ആദ്യ താരാട്ട് പെട്ടെഴുതി ലോക ചരിത്രത്തിൽ ഇടം നേടി."A Word To Mother "എന്ന പേരിൽ ഇന്ത്യൻ ഇംഗ്ലീഷിൽ ഒരു കവിതാസമാഹാരം രചിച്ചു.2020ൽ "പെണ്ണായവളുടെ കവിതകൾ "എന്ന കാവ്യ പുസ്തകത്തിലൂടെ എൽ ജി ബി ടി ഐ എ സമൂഹങ്ങളുടെ മനോവ്യാപാരങ്ങളെ കൃത്യമായി അടയാളപ്പെടുത്തി.2019ൽ ട്രാൻസ്ജെൻഡർ വിഭാഗത്തിൽനിന്നും സാഹിത്യ മേഖലയിലേക്കുള്ള സംഭാവനകൾക്ക് കേരള സംസ്ഥാന സർക്കാരിന്റെ അവാർഡ് ലഭിച്ചു.2016ൽ അരളി പുരസ്‌കാരം നേടി.പുറനാട്ടുകര കേന്ദ്രിയ വിദ്യാലയത്തിൽനിന്നും പ്രാഥമിക വിദ്യാഭ്യാസം.2005ൽ കാലികറ്റ് സർവ്വകലാശാലയിൽനിന്നും ബി എ ഡബിൾ മെയിനിൽ രണ്ടാം റാങ്ക്.2009 കളമശ്ശേരി രാജഗിരി കോളേജിൽനിന്നും ഫസ്റ്റ് ക്ലാസ്സോടെ MSW പൂർത്തിയാക്കി. സർക്കാർ -അർദ്ധ സർക്കാർ സ്വകാര്യ മേഖലകളിൽ സേവനം അനുഷ്ഠിച്ചിരുന്നു. ഇപ്പോൾ ഫ്രീ ലാൻസറായി സാമൂഹ്യ മേഖലയിൽ സജീവ സാനിധ്യം.1985ൽ തൃശൂർ മുതുവറയിൽ ജനനം.

അച്ഛൻ :വൈ. കൃഷ്ണൻ

അമ്മ :ജയ കൃഷ്ണൻ

ജീവിത പങ്കാളി : ജാഷിം പി.എം.

കണിയാംകോണത്ത് അമ്പാടി,

മുതുവറ, പുഴയ്ക്കൽ പി ഒ

തൃശൂർ -680553

ഫോൺ :9495712895

9544353029

ഇമെയിൽ :This email address is being protected from spambots. You need JavaScript enabled to view it.

---------------------------------------------------

കവിതാസ്വാദനം

അനാമിക പ്രകാശ്

ചാരം എന്നാൽ ഒടുവിലെ ആ ഒരുപിടി ധൂളികൾ. യഥാർത്ഥത്തിൽ അതല്ലേ ഉള്ളൂ അല്ലെങ്കിൽ അത്രയും ലഘുവായ നേരല്ലേ ഒരു ജന്മമെന്നത്..?
അത്രമേൽ വലിയൊരു സത്യം..!!

ഇവിടെകവയിത്രി;ആണെന്നതിൽഅഥവാ പെണ്ണെന്നതിൽ അഹങ്കരിക്കാൻ ഏതുമില്ലെന്നത് വളരെ തീക്ഷ്ണമായി തീവ്രമായി വ്യക്തമാക്കുന്നു.
ആണുങ്ങളെന്ന് ചമഞ്ഞോരെ കണ്ടിട്ടുണ്ട് എന്ന വാക്യം എത്ര മൂർച്ചയുള്ളതാണ് - 'ചമയുക' എന്ന ഒറ്റവാക്ക് തന്നെയും കൂർത്ത ഒരമ്പാണ്. പെണ്ണുങ്ങളെന്ന് 'കുറുകുന്നോരെയും' എന്നതും അത്ര തന്നെയും വ്യംഗ്യമോ മൂടുപടങ്ങളെ വലിച്ചുചീന്തലോ തന്നെയുമാണ്.

ഞാൻ രണ്ടിലും പെടാത്തൊരാൾ രണ്ടും തികഞ്ഞൊരാൾ എന്ന ഒറ്റ വരിയിൽ ട്രാൻജെന്റെർ കാഴ്ചപ്പാടിനെ വേറിട്ടൊരു കാഴ്ചയെന്നതിൽ നിന്നും അഥവാ മാറ്റിനിർത്തപ്പെടേണ്ടുന്ന അതല്ലെങ്കിൽ ഇറുകിപ്പിടിച്ചൊരു കാഴ്ച എന്നതിൽ നിന്നും തികവിൽ തികവാർന്ന ജന്മമെന്ന വായനയിലേക്ക് ഞൊടിയിടയിൽ നമ്മെ കൈപിടിക്കുന്നു. മനസ്സ് ഹാ...എന്ന് വലുതായൊരു ലഘുത്വം നേടുന്നുണ്ട് ആ നിമിഷം.
ജോലി ചുടലക്കാട്ടിലെന്ന വരികളിലും തുടർന്നുള്ള എന്ത് ആണ് എന്ത് പെണ്ണ്.. എല്ലാം ഒരുപിടി ചാരം എന്ന ഒടുവിലെ വരികളിലും എത്തിനിൽക്കേ കവിത മറ്റൊരു തലത്തിലേക്ക് ഉയർത്തപ്പെടുന്നുണ്ട്. ജീവിതമെന്ന നിസ്സാരത.. അതിൽ ആണെന്നോ പെണ്ണെന്നോ ഉള്ള വേർതിരിവുകൾക്കോ അഹങ്കാരങ്ങൾക്കോ അശേഷം സ്ഥാനമില്ലെന്നുള്ള തിരിച്ചറിവ് കവിത വെളിവാക്കുന്നു.

വിജയരാജമല്ലികയുടെ പുസ്തകങ്ങൾ ഓൺെലൈനിൽ ലഭ്യമാകുന്ന വെബ് സൈറ്റ് ലിങ്കുകൾ:

https://keralabookstore.com/books-by/vijayarajamallika/6077/

https://www.indulekha.com/index.php?route=product/author/info&author_id=5564

https://www.amazon.com/Vijayarajamallika/e/B08QSMM4G9%3Fref=dbs_a_mng_rwt_scns_share

https://www.flipkart.com/mallikavasantham/p/itmb6ed7add1ee51

https://www.bookswagon.com/book/mallikavasantham-vijayarajamallika/9789389671070

https://m.barnesandnoble.com/w/mallikavasantham-vijayarajamallika/1138889646