തിരുവനന്തപുരം: 2022 ലെ ഒഎൻവി സാഹിത്യ പുരസ്കാരം ടി പദ്മനാഭന്. ഒഎൻവി കൾച്ചറൽ അക്കാദമി വർഷം തോറും നൽകുന്ന പുരസ്കാരം മൂന്നു ലക്ഷം രൂപയും ശിൽപ്പവും പ്രശസ്തി പത്രവും ഉൾപ്പെടുന്നതാണ്.

ഡോ. എം എം ബഷീർ, ഡോ. ജോർജ് ഓണക്കൂർ, പ്രഭാവർമ്മ എന്നിവർ ഉൾപ്പെട്ട ജൂറിയാണ് പുരസ്കാര ജേതാവിനെ നിശ്ചയിച്ചത്. ഒഎൻവി ജയന്തി ദിനമായ മെയ് 27 നു തിരുവനന്തപുരത്തു വച്ച് പുരസ്കാരം സമർപ്പിക്കും.

മലയാള കഥാസാഹിത്യത്തെ ലോക കഥാസാഹിത്യരംഗത്തുയർത്തുന്നതിൽ നിസ്തുലമായ പങ്കു വഹിച്ച സർഗ്ഗധനനായ കഥാകാരനാണ് ടി പദ്മനാഭൻ എന്ന് ജൂറി വിലയിരുത്തി. 'ഗൗരി ', 'പ്രകാശം പരത്തുന്ന പെൺകുട്ടി', മഖൻ സിംഗിന്റെ മരണം, മരയ തുടങ്ങിയ കഥകളിലൂടെ അതുവരെ അനുഭവിക്കാത്ത അനുഭൂതിയുടെ അഭൗമ മണ്ഡലങ്ങളിലേക്ക് ടി പദ്മനാഭൻ അനുവാചക മനസ്സുകളെ ഉയർത്തിയതായും ജൂറി അഭിപ്രായപ്പെട്ടു.

2021 ലെ ഒഎൻവി യുവസാഹിത്യ പുരസ്കാരത്തിന് അരുൺകുമാർ അന്നൂർ രചിച്ച 'കലിനളൻ' എന്ന കൃതിയും 2022 ലെ പുരസ്കാരം അമൃത ദിനേശിന്റെ 'അമൃതഗീത' എന്ന കൃതിയും അർഹമായി.

പ്രഭാവർമ്മ, റോസ് മേരി, എസ്. മഹാദേവൻ തമ്പി എന്നിവർ ഉൾപ്പെട്ട ജൂറി 152 കൃതികളിൽ നിന്ന് ഏകകണ്ഠമായാണ് ഈ രണ്ടു കൃതികൾ തിരഞ്ഞെടുത്തത്. 50000 രൂപയും ശിൽപ്പവും പ്രശസ്തി പത്രവും അടങ്ങുന്നതാണ് യുവസാഹിത്യ പുരസ്കാരം. മലയാളകവിതയുടെ പ്രകാശപൂർണമായ ഭാവിയെ ദ്യോതിപ്പിക്കുന്ന കാമ്പും കരുത്തുമുള്ള സർഗ്ഗാത്മകതയുടെ തെളിച്ചം ഈ കാവ്യകൃതികളിൽ നിന്നും പ്രസരിക്കുന്നതായി ജൂറി അഭിപ്രായപ്പെട്ടു.

യുവസാഹിത്യ പുരസ്കാരങ്ങളും മെയ് 27 ന്റെ ചടങ്ങിൽ സമർപ്പിക്കുമെന്ന് ഒഎൻവി കൾച്ചറൽ അക്കാദമി പ്രസിഡന്റ് അടൂർ ഗോപാലകൃഷ്ണൻ, സെക്രട്ടറി എം ബി സനിൽ കുമാർ എന്നിവർ അറിയിച്ചു.